ឆ្នេរខ្សាច់កម្សាន្តទី៣របស់ខេត្តកំពតតុបតែងរួចរាល់សម្រាប់ទទួលភ្ញៀវក្នុងឱកាសបុណ្យចូលឆ្នាំថ្មី

ឆ្នេរខ្សាចកម្សាន្តចន្លោះស្ពានឥន្ធធនូ និងស្ពានថ្មី ដែលមានប្រវែងជាង៦០០ម៉ែត្រ មិនទាន់ស្ថាបនារួចរាល់ទាំងស្រុងនៅឡើយទេ ប៉ុន្តែក្នុងឱកាសចូលឆ្នាំថ្មីនេះ រដ្ឋបាលខេត្តនឹងបើកឲ្យទេសចរចូលកម្សាន្ត និងបានរៀបចំផ្លូវធ្វើដំណើរ ឈូសពង្រាបខ្សាច់ សម្អាតអនាម័យបរិស្ថាន និងតុបតែងភ្លើងព័ណ៍នៅតាមដើមឈើរួចរាល់ហើយ។ ភ្ញៀវទេសចរបានលើកឡើង ខេត្តកំពតនឹងកាន់តែទាក់ទាញបន្ថែមទៀត ខណៈដែលសមទ្ធិផលថ្មីៗត្រូវបានបើកឲ្យដំណើរការ។

អភិបាលក្រុងកំពត លោក លាង រឿនសុធី បានប្រាប់ឲ្យដឹងថា ក្រោមការណែនាំ និងចុះអនុវត្តផ្ទាល់របស់ឯកឧត្តម ម៉ៅ ធនិន អភិបាលខេត្តកំពត ឆ្នេរខ្សាច់កម្សាន្តចន្លោះស្ពានឥន្ធធនូ និងស្ពានថ្មី បានស្ថាបនាជិតរួចរាល់ហើយ ប៉ុន្តែដើម្បីអបអរសាទរ និងទទួលស្វាគមន៍ភ្ញៀវទេសចរក្នុងឱកាសបុណ្យចូលឆ្នាំថ្មី រដ្ឋបាលខេត្តបានរៀបចំកែលម្អរួចរាល់ហើយ ក្នុងនោះរដ្ឋបាលខេត្តបានឈូសឆាយពង្រាបខ្សាច់ធ្វើផ្លូវក្រាលថ្មម៉ិច កាត់តម្រឹមមែងឈើ និងបំពាក់ភ្លើងលម្អតាមដើមឈើ និងមែកឈើផងដែរ ។

លោកបានបន្តថា ឆ្នេរខ្សាច់កម្សាន្តនេះគឺជាឆ្នេរទី៣ របស់ខេត្តកំពត និងជាឆ្នេរទី២នៅក្នុងក្រុងកំពត ឆ្នេរនេះមានភាពទាក់ទាញខ្លាំង ព្រោះទីតាំងស្ថិរនៅកណ្តាលក្រុង ហើយមានកន្លែងកម្សាន្តជាច្រើននៅក្បែរៗឆ្នេរនោះ ដូចជាទូកទេសចរណ៍ កន្លែងកម្សាន្តនាពេលរាត្រី តំបន់ផ្សារក្រណាត់ជាដើម។

ចំណែកភ្ញៀវទេចរបានបង្ហាញចំណាប់អារម្មណ៍របស់ខ្លួនដែរថា ខេត្តកំពតមានការអភិវឌ្ឍន៍រីកចម្រើនយ៉ាងឆាប់រហ័ស ហើយក្រុងកំពតបច្ចុប្បន្ន មានឆ្នេរខ្សាច់កម្សាន្ត២ទីតាំង ដែលត្រូវបានរៀបចំសម្រាប់ទទួលទេសចរក្នុងឱកាសបុណ្យចូលឆ្នាំថ្មីខាងមុខនេះរួចរាលហើយ ខណៈដែលឆ្នេរកោះស្មៅស្រុកទឹកឈូ ដែលនៅជាប់ក្រុងកំពតឯនោះ កំពង់តែត្រៀមរៀបចំធ្វើសង្ក្រាន្តទឹកឈូផងដែរ។

ប្រធានមន្ទីរទេសចរណ៍ខេត្តកំពត លោក សយ ស៊ីណុល បានប្រាប់ឲ្យដឹង សម្រាប់ខេត្តកំពត មានឆ្នេរខ្សាច់កមន្សាន្តចំនួន៣ទីតាំងមានឆ្នេរកោះស្មៅស្រុកទឹកឈូ និងឆ្នេរពីរទៀត នៅចម្លោះស្ពានឥន្ធធនូ និងស្ពានថ្មី ដែលទើបកែលម្អ តុបតែងសម្រាប់បើកទទួលទេសចរពេលចូលឆ្នាំថ្មី និងឆ្នេរខ្សាច់កម្សាន្តមួយទៀតនៅខាងមុខចំណតទូកទេសចរណ៍ ។

លោកប្រធានមន្ទីរបានបញ្ជាក់ថា ដោយការយកចិត្តទុកដាក់ពីឯកឧត្តមអភិបាលខេត្ត ក្នុងការណែនាំដល់មន្ទីរអង្គភាពជុំវិញខេត្ត ឲ្យតុបតែង ស្ថាប័ន សម្អាត់អនាម័យបរិស្ថាន បំពាក់ភ្លើងព័ណ៍ ចងទង់ជ្វាលា រួមទាំងសមទ្ធិផលទេសចរណ៍មានរូបសំណាកសេះសមុទ្របាញ់ទឹកជាដើមនោះ លោកជឿថា កំពតសង្ក្រាន្តឆ្នាំនេះ និងមានទេសចរមកលេងច្រើនជាងឆ្នាំមុនៗ៕